बाजुराको बुढीगंगा नगरपालिकामा खटाइएका प्रमुख प्रशासकीय अधिकृत, उपसचिव भोजबहादुर ऐडीले पदबाट राजीनामा दिएका छन्। उनले बुधबार संघीय मामिला तथा सामान्य प्रशासन मन्त्रालयमा पुगेर औपचारिक रूपमा राजीनामापत्र दर्ता गराएका हुन्।
बिज्ञापन
हालै मात्र उपसचिवमा बढुवा भएका ५६ वर्षीय ऐडी दुर्गम क्षेत्रमा सरुवा गरिएपछि असन्तुष्ट रहँदै आएका थिए। उनले आफूलाई सुगम क्षेत्रमा खटाउन पटक–पटक आग्रह गरे पनि पुनः बुढीगंगामै खटाइएपछि काम गर्न कठिन भएको गुनासो गरेका छन्। व्यक्तिगत समस्यासमेत उल्लेख गर्दै उनले पद त्यागको निर्णय लिएका हुन्। यद्यपि, मन्त्रालयले उनको राजीनामा हालसम्म स्वीकृत गरिसकेको छैन।
बिज्ञापन
मन्त्रालयले ऐडीलाई २०८२ पुसमा बुढीगंगा नगरपालिकाको प्रमुख प्रशासकीय अधिकृतका रूपमा खटाएको थियो। सरुवा भएको दुई महिनापछि फागुनमा उनी हाजिर भए पनि एक सातामै फर्किएका थिए। त्यसपछि चैत १६ गते पुनः सोही स्थानमा पठाइए पनि उनी हालसम्म कार्यस्थलमा फर्किएका छैनन्।
यसबीच, बुढीगंगा नगरपालिका विगत चार महिनादेखि प्रमुख प्रशासकीय अधिकृतविहीन अवस्थामा सञ्चालन हुँदै आएको छ। प्रशासनिक नेतृत्व अभावका कारण दैनिक सेवा प्रवाहदेखि विकास निर्माणका कामहरू समेत प्रभावित हुँदै आएका छन्।
बिज्ञापन
दुर्गम क्षेत्रमा कर्मचारी खटाउने नीति र कर्मचारीहरूको असन्तुष्टिबीच उत्पन्न हुने यस्ता घटनाले संघीय प्रशासन व्यवस्थापनमा चुनौती थपिएको देखिन्छ।
